4.32.1

या त ऊतिर् अवमा या परमेति सूक्तं जहि वृष्ण्यानि कृणुही पराच इति वृषण्वद् द्वितीये ऽहनि द्वितीयस्याह्नो रूपम्

yā ta ūtir avamā yā parameti sūktaṃ jahi vṛṣṇyāni kṛṇuhī parāca iti vṛṣaṇvad dvitīye 'hani dvitīyasyāhno rūpam

4.32.2

विश्वो देवस्य नेतुस् तत् सवितुर् वरेण्यम् आ विश्वदेवं सत्पतिम् इति वैश्वदेवस्य प्रतिपदनुचरौ बार्हते ऽहनि द्वितीये ऽहनि द्वितीयस्याह्नो रूपम्

viśvo devasya netus tat savitur vareṇyam ā viśvadevaṃ satpatim iti vaiśvadevasya pratipadanucarau bārhate 'hani dvitīye 'hani dvitīyasyāhno rūpam

4.32.3

उद् उ ष्य देवः सविता हिरण्ययेति सावित्रम् ऊर्ध्ववद् द्वितीये ऽहनि द्वितीयस्याह्नो रूपम्

ud u ṣya devaḥ savitā hiraṇyayeti sāvitram ūrdhvavad dvitīye 'hani dvitīyasyāhno rūpam

4.32.4

ते हि द्यावापृथिवी विश्वशम्भुवेति द्यावापृथिवीयं सुजन्मनी धिषणे अन्तर् ईयत इत्य् अन्तर्वद् द्वितीये ऽहनि द्वितीयस्याह्नो रूपम्

te hi dyāvāpṛthivī viśvaśambhuveti dyāvāpṛthivīyaṃ sujanmanī dhiṣaṇe antar īyata ity antarvad dvitīye 'hani dvitīyasyāhno rūpam

4.32.5

तक्षन् रथं सुवृतं विद्मनापस इत्य् आर्भवं तक्षन् हरी इन्द्रवाहा वृषण्वसू इति वृषण्वद् द्वितीये ऽहनि द्वितीयस्याह्नो रूपम्

takṣan rathaṃ suvṛtaṃ vidmanāpasa ity ārbhavaṃ takṣan harī indravāhā vṛṣaṇvasū iti vṛṣaṇvad dvitīye 'hani dvitīyasyāhno rūpam

4.32.6

यज्ञस्य वो रथ्यं विश्पतिं विशाम् इति वैश्वदेवं वृषा केतुर् यजतो द्याम् अशायतेति वृषण्वद् द्वितीये ऽहनि द्वितीयस्याह्नो रूपम्

yajñasya vo rathyaṃ viśpatiṃ viśām iti vaiśvadevaṃ vṛṣā ketur yajato dyām aśāyateti vṛṣaṇvad dvitīye 'hani dvitīyasyāhno rūpam

4.32.7

तद् उ शार्यातम् अङ्गिरसो वै स्वर्गाय लोकाय सत्रम् आसत ते ह स्म द्वितीयं द्वितीयम् एवाहर् आगत्य मुह्यन्ति तान् वा एतच् छार्यातो मानवो द्वितीये ऽहनि सूक्तम् अशंसयत् ततो वै ते प्र यज्ञम् अजानन् प्र स्वर्गं लोकं तद् यद् एतत् सूक्तं द्वितीये ऽहनि शंसति यज्ञस्य प्रज्ञात्यै स्वर्गस्य लोकस्यानुख्यात्यै

tad u śāryātam aṅgiraso vai svargāya lokāya satram āsata te ha sma dvitīyaṃ dvitīyam evāhar āgatya muhyanti tān vā etac chāryāto mānavo dvitīye 'hani sūktam aśaṃsayat tato vai te pra yajñam ajānan pra svargaṃ lokaṃ tad yad etat sūktaṃ dvitīye 'hani śaṃsati yajñasya prajñātyai svargasya lokasyānukhyātyai

4.32.8

पृक्षस्य वृष्णो अरुषस्य नू सह इत्य् आग्निमारुतस्य प्रतिपद् वृषण्वद् द्वितीये ऽहनि द्वितीयस्याह्नो रूपम्

pṛkṣasya vṛṣṇo aruṣasya nū saha ity āgnimārutasya pratipad vṛṣaṇvad dvitīye 'hani dvitīyasyāhno rūpam

4.32.9

वृष्णे शर्धाय सुमखाय वेधस इति मारुतं वृषण्वद् द्वितीये ऽहनि द्वितीयस्याह्नो रूपम्

vṛṣṇe śardhāya sumakhāya vedhasa iti mārutaṃ vṛṣaṇvad dvitīye 'hani dvitīyasyāhno rūpam

4.32.10

जातवेदसे सुनवाम सोमम् इति जातवेदस्याच्युता

jātavedase sunavāma somam iti jātavedasyācyutā

4.32.11

यज्ञेन वर्धत जातवेदसम् इति जातवेदस्यं वृधन्वद् द्वितीये ऽहनि द्वितीयस्याह्नो रूपम् अह्नो रूपम्

yajñena vardhata jātavedasam iti jātavedasyaṃ vṛdhanvad dvitīye 'hani dvitīyasyāhno rūpam ahno rūpam

5.1.1

विश्वे वै देवा देवतास् तृतीयम् अहर् वहन्ति सप्तदशः स्तोमो वैरूपं साम जगती छन्दः

viśve vai devā devatās tṛtīyam ahar vahanti saptadaśaḥ stomo vairūpaṃ sāma jagatī chandaḥ

5.1.2

यथादेवतम् एनेन यथास्तोमं यथासाम यथाछन्दसं राध्नोति य एवं वेद

yathādevatam enena yathāstomaṃ yathāsāma yathāchandasaṃ rādhnoti ya evaṃ veda

5.1.3

यद् वै समानोदर्कं तत् तृतीयस्याह्नो रूपं यद् अश्ववद् यद् अन्तवद् यत् पुनरावृत्तं यत् पुनर्निनृत्तं यद् रतवद् यत् पर्यस्तवद् यत् त्रिवद् यद् अन्तरूपं यद् उत्तमे पदे देवता निरुच्यते यद् असौ लोको ऽभ्युदितो यद् वैरूपं यज् जागतं यत् कृतम् एतानि वै तृतीयस्याह्नो रूपाणि

yad vai samānodarkaṃ tat tṛtīyasyāhno rūpaṃ yad aśvavad yad antavad yat punarāvṛttaṃ yat punarninṛttaṃ yad ratavad yat paryastavad yat trivad yad antarūpaṃ yad uttame pade devatā nirucyate yad asau loko 'bhyudito yad vairūpaṃ yaj jāgataṃ yat kṛtam etāni vai tṛtīyasyāhno rūpāṇi

5.1.4

युक्ष्वा हि देवहूतमाṁ अश्वाṁ अग्ने रथीर् इवेति तृतीयस्याह्न आज्यम् भवति

yukṣvā hi devahūtamāṁ aśvāṁ agne rathīr iveti tṛtīyasyāhna ājyam bhavati

5.1.5

देवा वै तृतीयेनाह्ना स्वर्गं लोकम् आयंस् तान् असुरा रक्षांस्य् अन्ववारयन्त ते विरूपा भवत विरूपा भवतेति भवन्त आयंस् ते यद् विरूपा भवत विरूपा भवतेति भवन्त आयंस् तद् वैरूपं सामाभवत् तद् वैरूपस्य वैरूपत्वम्

devā vai tṛtīyenāhnā svargaṃ lokam āyaṃs tān asurā rakṣāṃsy anvavārayanta te virūpā bhavata virūpā bhavateti bhavanta āyaṃs te yad virūpā bhavata virūpā bhavateti bhavanta āyaṃs tad vairūpaṃ sāmābhavat tad vairūpasya vairūpatvam

5.1.6

विरूपः पाप्मना भूत्वा पाप्मानम् अपहते य एवं वेद

virūpaḥ pāpmanā bhūtvā pāpmānam apahate ya evaṃ veda

5.1.7

तान् ह स्मान्व् एवागच्छन्ति सम् एव सृज्यन्ते तान् अश्वा भूत्वा पद्भिर् अपाघ्नत यद् अश्वा भूत्वा पद्भिर् अपाघ्नत तद् अश्वानाम् अश्वत्वम्

tān ha smānv evāgacchanti sam eva sṛjyante tān aśvā bhūtvā padbhir apāghnata yad aśvā bhūtvā padbhir apāghnata tad aśvānām aśvatvam

5.1.8

अश्नुते यद् यत् कामयते य एवं वेद

aśnute yad yat kāmayate ya evaṃ veda

5.1.9

तस्माद् अश्वः पशूनां जविष्ठस् तस्माद् अश्वः प्रत्यङ् पदा हिनस्ति

tasmād aśvaḥ paśūnāṃ javiṣṭhas tasmād aśvaḥ pratyaṅ padā hinasti

Aitareyabrāhmaṇa