4.23.6

गायत्र्या पक्षिण्या चक्षुष्मत्या ज्योतिष्मत्या भास्वत्या स्वर्गं लोकम् एति य एवं वेद

gāyatryā pakṣiṇyā cakṣuṣmatyā jyotiṣmatyā bhāsvatyā svargaṃ lokam eti ya evaṃ veda

4.24.1

त्रयश् च वा एते त्र्यहा आ दशमम् अहर् आ द्वाव् अतिरात्रौ यद् द्वादशाहः

trayaś ca vā ete tryahā ā daśamam ahar ā dvāv atirātrau yad dvādaśāhaḥ

4.24.2

द्वादशाहानि दीक्षितो भवति यज्ञिय एव तैर् भवति

dvādaśāhāni dīkṣito bhavati yajñiya eva tair bhavati

4.24.3

द्वादश रात्रीर् उपसद उपैति शरीरम् एव ताभिर् धूनुते

dvādaśa rātrīr upasada upaiti śarīram eva tābhir dhūnute

4.24.4

द्वादशाहम् प्रसुतः

dvādaśāham prasutaḥ

4.24.5

भूत्वा शरीरं धूत्वा शुद्धः पूतो देवता अप्येति य एवं वेद

bhūtvā śarīraṃ dhūtvā śuddhaḥ pūto devatā apyeti ya evaṃ veda

4.24.6

षट्त्रिंशदहो वा एष यद् द्वादशाहः षट्त्रिंशदक्षरा वै बृहती बृहत्या वा एतद् अयनं यद् द्वादशाहो बृहत्या वै देवा इमांल्लोकान् आश्नुवत ते वै दशभिर् एवाक्षरैर् इमं लोकम् आश्नुवत दशभिर् अन्तरिक्षम् दशभिर् दिवं चतुर्भिश् चतस्रो दिशो द्वाभ्याम् एवास्मिंल्लोके प्रत्यतिष्ठन्

ṣaṭtriṃśadaho vā eṣa yad dvādaśāhaḥ ṣaṭtriṃśadakṣarā vai bṛhatī bṛhatyā vā etad ayanaṃ yad dvādaśāho bṛhatyā vai devā imāṃllokān āśnuvata te vai daśabhir evākṣarair imaṃ lokam āśnuvata daśabhir antarikṣam daśabhir divaṃ caturbhiś catasro diśo dvābhyām evāsmiṃlloke pratyatiṣṭhan

4.24.7

प्रतितिष्ठति य एवं वेद

pratitiṣṭhati ya evaṃ veda

4.24.8

तद् आहुर् यद् अन्यानि छन्दांसि वर्षीयांसि भूयो ऽक्षरतराण्य् अथ कस्माद् एताम् बृहतीत्य् आचक्षत इति

tad āhur yad anyāni chandāṃsi varṣīyāṃsi bhūyo 'kṣaratarāṇy atha kasmād etām bṛhatīty ācakṣata iti

4.24.9

एतया हि देवा इमांल्लोकान् आश्नुवत ते वै दशभिर् एवाक्षरैर् इमं लोकम् आश्नुवत दशभिर् अन्तरिक्षं दशभिर् दिवं चतुर्भिश् चतस्रो दिशो द्वाभ्याम् एवास्मिंल्लोके प्रत्यतिष्ठंस् तस्माद् एताम् बृहतीत्य् आचक्षते

etayā hi devā imāṃllokān āśnuvata te vai daśabhir evākṣarair imaṃ lokam āśnuvata daśabhir antarikṣaṃ daśabhir divaṃ caturbhiś catasro diśo dvābhyām evāsmiṃlloke pratyatiṣṭhaṃs tasmād etām bṛhatīty ācakṣate

4.24.10

अश्नुते यद्यत् कामयते य एवं वेद

aśnute yadyat kāmayate ya evaṃ veda

4.25.1

प्रजापतियज्ञो वा एष यद् द्वादशाहः प्रजापतिर् वा एतेनाग्रे ऽयजत द्वादशाहेन सो ऽब्रवीद् ऋतूंश्च मासांश्च याजयत मा द्वादशाहेनेति तं दीक्षयित्वानपक्रमं गमयित्वाब्रुवन् देहि नु नो ऽथ त्वा याजयिष्याम इति तेभ्य इषम् ऊर्जम् प्रायच्छत् सैषोर्ग् ऋतुषु च मासेषु च निहिता ददतं वै ते तम् अयाजयंस् तस्माद् ददद् याज्यः प्रतिगृह्णन्तो वै ते तम् अयाजयंस् तस्मात् प्रतिगृह्णता याज्यम्

prajāpatiyajño vā eṣa yad dvādaśāhaḥ prajāpatir vā etenāgre 'yajata dvādaśāhena so 'bravīd ṛtūṃśca māsāṃśca yājayata mā dvādaśāheneti taṃ dīkṣayitvānapakramaṃ gamayitvābruvan dehi nu no 'tha tvā yājayiṣyāma iti tebhya iṣam ūrjam prāyacchat saiṣorg ṛtuṣu ca māseṣu ca nihitā dadataṃ vai te tam ayājayaṃs tasmād dadad yājyaḥ pratigṛhṇanto vai te tam ayājayaṃs tasmāt pratigṛhṇatā yājyam

4.25.2

उभये राध्नुवन्ति य एवं विद्वांसो यजन्ते च याजयन्ति च

ubhaye rādhnuvanti ya evaṃ vidvāṃso yajante ca yājayanti ca

4.25.3

ते वा इम ऋतवश् च मासाश् च गुरव इवामन्यन्त द्वादशाहे प्रतिगृह्य ते ऽब्रुवन् प्रजापतिं याजय नो द्वादशाहेनेति स तथेत्य् अब्रवीत् ते वै दीक्षध्वम् इति ते पूर्वपक्षाः पूर्वे ऽदीक्षन्त ते पाप्मानम् अपाहत तस्मात् ते दिवेव दिवेव ह्य् अपहतपाप्मानो ऽपरपक्षा अपरे ऽदीक्षन्त ते नतराम् पाप्मानम् अपाहत तस्मात् ते तम इव तम इव ह्य् अनपहतपाप्मानस् तस्माद् एवं विद्वान् दीक्षमाणेषु पूर्वः पूर्व एव दिदीक्षिषेत

te vā ima ṛtavaś ca māsāś ca gurava ivāmanyanta dvādaśāhe pratigṛhya te 'bruvan prajāpatiṃ yājaya no dvādaśāheneti sa tathety abravīt te vai dīkṣadhvam iti te pūrvapakṣāḥ pūrve 'dīkṣanta te pāpmānam apāhata tasmāt te diveva diveva hy apahatapāpmāno 'parapakṣā apare 'dīkṣanta te natarām pāpmānam apāhata tasmāt te tama iva tama iva hy anapahatapāpmānas tasmād evaṃ vidvān dīkṣamāṇeṣu pūrvaḥ pūrva eva didīkṣiṣeta

4.25.4

अप पाप्मानं हते य एवं वेद

apa pāpmānaṃ hate ya evaṃ veda

4.25.5

स वा अयम् प्रजापतिः संवत्सर ऋतुषु च मासेषु च प्रत्यतिष्ठत् ते वा इम ऋतवश् च मासाश् च प्रजापताव् एव संवत्सरे प्रत्यतिष्ठंस् त एते ऽन्योन्यस्मिन् प्रतिष्ठिता एवं ह वाव स ऋत्विजि प्रतितिष्ठति यो द्वादशाहेन यजते तस्माद् आहुर् न पापः पुरुषो याज्यो द्वादशाहेन नेद् अयम् मयि प्रतितिष्ठाद् इति

sa vā ayam prajāpatiḥ saṃvatsara ṛtuṣu ca māseṣu ca pratyatiṣṭhat te vā ima ṛtavaś ca māsāś ca prajāpatāv eva saṃvatsare pratyatiṣṭhaṃs ta ete 'nyonyasmin pratiṣṭhitā evaṃ ha vāva sa ṛtviji pratitiṣṭhati yo dvādaśāhena yajate tasmād āhur na pāpaḥ puruṣo yājyo dvādaśāhena ned ayam mayi pratitiṣṭhād iti

4.25.6

ज्येष्ठयज्ञो वा एष यद् द्वादशाहः स वै देवानां ज्येष्ठो य एतेनाग्रे ऽयजत श्रेष्ठयज्ञो वा एष यद् द्वादशाहः स वै देवानां श्रेष्ठो य एतेनाग्रे ऽयजत

jyeṣṭhayajño vā eṣa yad dvādaśāhaḥ sa vai devānāṃ jyeṣṭho ya etenāgre 'yajata śreṣṭhayajño vā eṣa yad dvādaśāhaḥ sa vai devānāṃ śreṣṭho ya etenāgre 'yajata

4.25.7

ज्येष्ठः श्रेष्ठो यजेत कल्याणीह समा भवति न पापः पुरुषो याज्यो द्वादशाहेन नेद् अयम् मयि प्रतितिष्ठाद् इति

jyeṣṭhaḥ śreṣṭho yajeta kalyāṇīha samā bhavati na pāpaḥ puruṣo yājyo dvādaśāhena ned ayam mayi pratitiṣṭhād iti

4.25.8

इन्द्राय वै देवा ज्यैष्ठ्याय श्रैष्ठ्याय नातिष्ठन्त सो ऽब्रवीद् बृहस्पतिं याजय मा द्वादशाहेनेति तम् अयाजयत् ततो वै तस्मै देवा ज्यैष्ठ्याय श्रैष्ठ्यायातिष्ठन्त

indrāya vai devā jyaiṣṭhyāya śraiṣṭhyāya nātiṣṭhanta so 'bravīd bṛhaspatiṃ yājaya mā dvādaśāheneti tam ayājayat tato vai tasmai devā jyaiṣṭhyāya śraiṣṭhyāyātiṣṭhanta

4.25.9

तिष्ठन्ते ऽस्मै स्वा ज्यैष्ठ्याय श्रैष्ठ्याय सम् अस्मिन् स्वाः श्रेष्ठतायां जानते य एवं वेद

tiṣṭhante 'smai svā jyaiṣṭhyāya śraiṣṭhyāya sam asmin svāḥ śreṣṭhatāyāṃ jānate ya evaṃ veda

Aitareyabrāhmaṇa