4.11.16

ब्रह्मवर्चसी ब्रह्मयशसी वीर्यवान् भवति यत्रैवं विद्वान् गायत्र्या च त्रिष्टुभा च वषट्करोति

brahmavarcasī brahmayaśasī vīryavān bhavati yatraivaṃ vidvān gāyatryā ca triṣṭubhā ca vaṣaṭkaroti

4.11.17

अश्विना वायुना युवं सुदक्षोभा पिबतम् अश्विनेति

aśvinā vāyunā yuvaṃ sudakṣobhā pibatam aśvineti

4.11.18

गायत्र्या च विराजा च वषट्कुर्याद् ब्रह्म वै गायत्र्य् अन्नं विराड् ब्रह्मणैव तद् अन्नाद्यं संदधाति

gāyatryā ca virājā ca vaṣaṭkuryād brahma vai gāyatry annaṃ virāḍ brahmaṇaiva tad annādyaṃ saṃdadhāti

4.11.19

ब्रह्मवर्चसी ब्रह्मयशसी भवति ब्रह्माद्यम् अन्नम् अत्ति यत्रैवं विद्वान् गायत्र्या च विराजा च वषट्करोति

brahmavarcasī brahmayaśasī bhavati brahmādyam annam atti yatraivaṃ vidvān gāyatryā ca virājā ca vaṣaṭkaroti

4.11.20

तस्माद् एवं विद्वान् गायत्र्या चैव विराजा च वषट्कुर्यात् प्र वाम् अन्धांसि मद्यान्य् अस्थुर् उभा पिबतम् अश्विनेत्य् एताभ्याम्

tasmād evaṃ vidvān gāyatryā caiva virājā ca vaṣaṭkuryāt pra vām andhāṃsi madyāny asthur ubhā pibatam aśvinety etābhyām

4.12.1

चतुर्विंशम् एतद् अहर् उपयन्त्य् आरम्भणीयम्

caturviṃśam etad ahar upayanty ārambhaṇīyam

4.12.2

एतेन वै संवत्सरम् आरभन्त एतेन स्तोमांश् च छन्दांसि चैतेन सर्वा देवता अनारब्धं वै तच् छन्दो ऽनारब्धा सा देवता यद् एतस्मिन्न् अहनि नारभन्ते तद् आरम्भणीयस्यारम्भणीयत्वम्

etena vai saṃvatsaram ārabhanta etena stomāṃś ca chandāṃsi caitena sarvā devatā anārabdhaṃ vai tac chando 'nārabdhā sā devatā yad etasminn ahani nārabhante tad ārambhaṇīyasyārambhaṇīyatvam

4.12.3

चतुर्विंशः स्तोमो भवति तच् चतुर्विंशस्य चतुर्विंशत्वम्

caturviṃśaḥ stomo bhavati tac caturviṃśasya caturviṃśatvam

4.12.4

चतुर्विंशतिर् वा अर्धमासा अर्धमासश एव तत् संवत्सरम् आरभन्ते

caturviṃśatir vā ardhamāsā ardhamāsaśa eva tat saṃvatsaram ārabhante

4.12.5

उक्थ्यो भवति पशवो वा उक्थानि पशूनाम् अवरुद्ध्यै

ukthyo bhavati paśavo vā ukthāni paśūnām avaruddhyai

4.12.6

तस्य पञ्चदश स्तोत्राणि भवन्ति पञ्चदश शस्त्रानि स मासो मासश एव तत् संवत्सरम् आरभन्ते

tasya pañcadaśa stotrāṇi bhavanti pañcadaśa śastrāni sa māso māsaśa eva tat saṃvatsaram ārabhante

4.12.7

तस्य षष्टिश् च त्रीणि च शतानि स्तोत्रियास् तावन्ति संवत्सरस्याहान्य् अहश्श एव तत् संवत्सरम् आरभन्ते

tasya ṣaṣṭiś ca trīṇi ca śatāni stotriyās tāvanti saṃvatsarasyāhāny ahaśśa eva tat saṃvatsaram ārabhante

4.12.8

अग्निष्टोम एतद् अहः स्याद् इत्य् आहुर् अग्निष्टोमो वै संवत्सरो न वा एतद् अन्यो ऽग्निष्टोमाद् अहर् दाधार न विव्याचेति

agniṣṭoma etad ahaḥ syād ity āhur agniṣṭomo vai saṃvatsaro na vā etad anyo 'gniṣṭomād ahar dādhāra na vivyāceti

4.12.9

स यद्य् अग्निष्टोमः स्याद् अष्टाचत्वारिंशास् त्रयः पवमानाः स्युश् चतुर्विंशानीतराणि स्तोत्राणि तद् उ षष्टिश् चैव त्रीणि च शतानि स्तोत्रियास् तावन्ति संवत्सरस्याहान्य् अहश्श एव तत् संवत्सरम् आरभन्ते

sa yady agniṣṭomaḥ syād aṣṭācatvāriṃśās trayaḥ pavamānāḥ syuś caturviṃśānītarāṇi stotrāṇi tad u ṣaṣṭiś caiva trīṇi ca śatāni stotriyās tāvanti saṃvatsarasyāhāny ahaśśa eva tat saṃvatsaram ārabhante

4.12.10

उक्थ्य एव स्यात् पशुसमृद्धो यज्ञः पशुसमृद्धं सत्रं सर्वाणि चतुर्विंशानि स्तोत्राणि प्रत्यक्षाद्ध्येतद् अहश् चतुर्विंशं तस्माद् उक्थ्य एव स्यात्

ukthya eva syāt paśusamṛddho yajñaḥ paśusamṛddhaṃ satraṃ sarvāṇi caturviṃśāni stotrāṇi pratyakṣāddhyetad ahaś caturviṃśaṃ tasmād ukthya eva syāt

4.13.1

बृहद्रथंतरे सामनी भवत एते वै यज्ञस्य नावौ सम्पारिण्यौ यद् बृहद्रथंतरे ताभ्याम् एव तत् संवत्सरं तरन्ति

bṛhadrathaṃtare sāmanī bhavata ete vai yajñasya nāvau sampāriṇyau yad bṛhadrathaṃtare tābhyām eva tat saṃvatsaraṃ taranti

4.13.2

पादौ वै बृहद्रथंतरे शिर एतद् अहः पादाभ्याम् एव तच्छ्रियं शिरो ऽभ्यायन्ति

pādau vai bṛhadrathaṃtare śira etad ahaḥ pādābhyām eva tacchriyaṃ śiro 'bhyāyanti

4.13.3

पक्षौ वै बृहद्रथंतरे शिर एतद् अहः पक्षाभ्याम् एव तच्छ्रियं शिरो ऽभ्यायुवते

pakṣau vai bṛhadrathaṃtare śira etad ahaḥ pakṣābhyām eva tacchriyaṃ śiro 'bhyāyuvate

4.13.4

ते उभे न समवसृज्ये य उभे समवसृजेयुर् यथैव छिन्ना नौर् बन्धनात् तीरं तीरम् ऋच्छन्ती प्लवेतैवम् एव ते सत्रिणस् तीरं तीरम् ऋच्छन्तः प्लवेरन् य उभे समवसृजेयुः

te ubhe na samavasṛjye ya ubhe samavasṛjeyur yathaiva chinnā naur bandhanāt tīraṃ tīram ṛcchantī plavetaivam eva te satriṇas tīraṃ tīram ṛcchantaḥ plaveran ya ubhe samavasṛjeyuḥ

4.13.5

तद् यदि रथंतरम् अवसृजेयुर् बृहतैवोभे अनवसृष्टे अथ यदि बृहद् अवसृजेयू रथंतरेणैवोभे अनवसृष्टे

tad yadi rathaṃtaram avasṛjeyur bṛhataivobhe anavasṛṣṭe atha yadi bṛhad avasṛjeyū rathaṃtareṇaivobhe anavasṛṣṭe

Aitareyabrāhmaṇa