4.10.14

विश्वस्य देवी मृचयस्य जन्मनो न या रोषाति न ग्रभद् इति द्विपदाम् शंसति

viśvasya devī mṛcayasya janmano na yā roṣāti na grabhad iti dvipadām śaṃsati

4.10.15

चितैधम् उक्थम् इति ह स्म वा एतद् आचक्षते यद् एतद् आश्विनं निरृतिर् ह स्म पाशिन्य् उपास्ते यदैव होता परिधास्यत्य् अथ पाशान् प्रतिमोक्ष्यामीति ततो वा एताम् बृहस्पतिर् द्विपदाम् अपश्यन् न या रोषाति न ग्रभद् इति तया निरृत्याः पाशिन्या अधराचः पाशान् अपास्यत् तद् यद् एतां द्विपदां होता शंसति निरृत्या एव तत् पाशिन्या अधराचः पाशान् अपास्यति स्वस्त्य् एव होतोन्मुच्यते सर्वायुः सर्वायुत्वाय

citaidham uktham iti ha sma vā etad ācakṣate yad etad āśvinaṃ nirṛtir ha sma pāśiny upāste yadaiva hotā paridhāsyaty atha pāśān pratimokṣyāmīti tato vā etām bṛhaspatir dvipadām apaśyan na yā roṣāti na grabhad iti tayā nirṛtyāḥ pāśinyā adharācaḥ pāśān apāsyat tad yad etāṃ dvipadāṃ hotā śaṃsati nirṛtyā eva tat pāśinyā adharācaḥ pāśān apāsyati svasty eva hotonmucyate sarvāyuḥ sarvāyutvāya

4.10.16

सर्वम् आयुर् एति य एवं वेद

sarvam āyur eti ya evaṃ veda

4.10.17

मृचयस्य जन्मन इत्य् असौ वाव मर्चयतीव तेन सूर्यं नातिशंसति

mṛcayasya janmana ity asau vāva marcayatīva tena sūryaṃ nātiśaṃsati

4.10.18

यद् उ द्विपदा पुरुषछन्दसं सा सर्वाणि छन्दांस्य् अभ्याप्ता तेन बृहतीं नातिशंसति

yad u dvipadā puruṣachandasaṃ sā sarvāṇi chandāṃsy abhyāptā tena bṛhatīṃ nātiśaṃsati

4.11.1

ब्राह्मणस्पत्यया परिदधाति ब्रह्म वै बृहस्पतिर् ब्रह्मण्य् एवैनं तद् अन्ततः प्रतिष्ठापयति

brāhmaṇaspatyayā paridadhāti brahma vai bṛhaspatir brahmaṇy evainaṃ tad antataḥ pratiṣṭhāpayati

4.11.2

एवा पित्रे विश्वदेवाय वृष्ण इत्य् एतया परिदध्यात् प्रजाकामः पशुकामः

evā pitre viśvadevāya vṛṣṇa ity etayā paridadhyāt prajākāmaḥ paśukāmaḥ

4.11.3

बृहस्पते सुप्रजा वीरवन्त इति प्रजया वै सुप्रजा वीरवान्

bṛhaspate suprajā vīravanta iti prajayā vai suprajā vīravān

4.11.4

वयं स्याम पतयो रयीणाम् इति

vayaṃ syāma patayo rayīṇām iti

4.11.5

प्रजावान् पशुमान् रयिमान् वीरवान् भवति यत्रैवं विद्वान् एतया परिदधाति

prajāvān paśumān rayimān vīravān bhavati yatraivaṃ vidvān etayā paridadhāti

4.11.6

बृहस्पते अति यद् अर्यो अर्हाद् इत्य् एतया परिदध्यात् तेजस्कामो ब्रह्मवर्चसकामो ऽतीव वान्यान् ब्रह्मवर्चसम् अर्हति

bṛhaspate ati yad aryo arhād ity etayā paridadhyāt tejaskāmo brahmavarcasakāmo 'tīva vānyān brahmavarcasam arhati

4.11.7

द्युमद् इति द्युमद् इव वै ब्रह्मवर्चसं विभातीति वीव वै ब्रह्मवर्चसम् भाति

dyumad iti dyumad iva vai brahmavarcasaṃ vibhātīti vīva vai brahmavarcasam bhāti

4.11.8

यद् दीदयच् छवस ऋतप्रजातेति दीदायेव वै ब्रह्मवर्चसम्

yad dīdayac chavasa ṛtaprajāteti dīdāyeva vai brahmavarcasam

4.11.9

तद् अस्मासु द्रविणं धेहि चित्रम् इति चित्रम् इव वै ब्रह्मवर्चसम्

tad asmāsu draviṇaṃ dhehi citram iti citram iva vai brahmavarcasam

4.11.10

ब्रह्मवर्चसी ब्रह्मयशसी भवति यत्रैवं विद्वान् एतया परिदधाति

brahmavarcasī brahmayaśasī bhavati yatraivaṃ vidvān etayā paridadhāti

4.11.11

तस्माद् एवं विद्वान् एतयैव परिदध्यात्

tasmād evaṃ vidvān etayaiva paridadhyāt

4.11.12

ब्राह्मणस्पत्या तेन सूर्यं नातिशंसति

brāhmaṇaspatyā tena sūryaṃ nātiśaṃsati

4.11.13

यद् उ त्रिष्टुभं त्रिः शंसति सा सर्वाणि छन्दांस्य् अभ्याप्ता तेन बृहतीं नातिशंसति

yad u triṣṭubhaṃ triḥ śaṃsati sā sarvāṇi chandāṃsy abhyāptā tena bṛhatīṃ nātiśaṃsati

4.11.14

गायत्र्या च त्रिष्टुभा च वषट्कुर्यात्

gāyatryā ca triṣṭubhā ca vaṣaṭkuryāt

4.11.15

ब्रह्म वै गायत्री वीर्यम् त्रिष्टुब् ब्रह्मणैव तद् वीर्यं संदधाति

brahma vai gāyatrī vīryam triṣṭub brahmaṇaiva tad vīryaṃ saṃdadhāti

Aitareyabrāhmaṇa