3.47.10

तद्धैक आहुर् धातारम् एव सर्वासाम् पुरस्तात् पुरस्ताद् आज्येन परियजेत् तद् आसु सर्वासु मिथुनं दधातीति

taddhaika āhur dhātāram eva sarvāsām purastāt purastād ājyena pariyajet tad āsu sarvāsu mithunaṃ dadhātīti

3.47.11

तद् उ वा आहुर् जामि वा एतद् यज्ञे क्रियते यत्र समानीभ्याम् ऋग्भ्यां समाने ऽहन् यजतीति

tad u vā āhur jāmi vā etad yajñe kriyate yatra samānībhyām ṛgbhyāṃ samāne 'han yajatīti

3.47.12

यदि ह वा अपि बह्व्य इव जायाः पतिर् वाव तासाम् मिथुनं तद् यद् आसां धातारम् पुरस्ताद् यजति तद् आसु सर्वासु मिथुनं दधाति

yadi ha vā api bahvya iva jāyāḥ patir vāva tāsām mithunaṃ tad yad āsāṃ dhātāram purastād yajati tad āsu sarvāsu mithunaṃ dadhāti

3.47.13

इति नु देविकानाम्

iti nu devikānām

3.48.1

अथ देवीनाम्

atha devīnām

3.48.2

सूर्याय पुरोﾱआशम् एककपालं यः सूर्यः स धाता स उ एव वषट्कारः

sūryāya puroﾱāśam ekakapālaṃ yaḥ sūryaḥ sa dhātā sa u eva vaṣaṭkāraḥ

3.48.3

दिवे चरुं या द्यौः सानुमतिः सो एव गायत्र्य् उषसे चरुं योषाः सा राका सो एव त्रिष्टुब् गवे चरुं या गौः सा सिनीवाली सो एव जगती पृथिव्यै चरुं या पृथिवी सा कुहूः सो एवानुष्टुप्

dive caruṃ yā dyauḥ sānumatiḥ so eva gāyatry uṣase caruṃ yoṣāḥ sā rākā so eva triṣṭub gave caruṃ yā gauḥ sā sinīvālī so eva jagatī pṛthivyai caruṃ yā pṛthivī sā kuhūḥ so evānuṣṭup

3.48.4

एतानि वाव सर्वाणि छन्दांसि गायत्रं त्रैष्टुभं जागतम् आनुष्टुभम् अन्व् अन्यान्य् एतानि हि यज्ञे प्रतमाम् इव क्रियन्त एतैर् ह वा अस्य छन्दोभिर् यजतः सर्वैश् छन्दोभिर् इष्टम् भवति य एवं वेद तद् वै यद् इदम् आहुः सुधायां ह वै वाजी सुहितो दधातीति छन्दांसि वै तत् सुधायां ह वा एनं छन्दांसि दधत्य् अननुध्यायिनं लोकं जयति य एवं वेद तद्धैक आहुः सूर्यम् एव सर्वासाम् पुरस्तात् पुरस्ताद् आज्येन परियजेत् तद् आसु सर्वासु मिथुनं दधातीति तद् उ वा आहुर् जामि वा एतद् यज्ञे क्रियते यत्र समानीभ्याम् ऋग्भ्यां समाने ऽहन् यजतीति यदि ह वा अपि बह्व्य इव जायाः पतिर् वाव तासाम् मिथुनं तद् यद् आसां सूर्यम् पुरस्ताद् यजति तद् आसु सर्वासु मिथुनं दधाति

etāni vāva sarvāṇi chandāṃsi gāyatraṃ traiṣṭubhaṃ jāgatam ānuṣṭubham anv anyāny etāni hi yajñe pratamām iva kriyanta etair ha vā asya chandobhir yajataḥ sarvaiś chandobhir iṣṭam bhavati ya evaṃ veda tad vai yad idam āhuḥ sudhāyāṃ ha vai vājī suhito dadhātīti chandāṃsi vai tat sudhāyāṃ ha vā enaṃ chandāṃsi dadhaty ananudhyāyinaṃ lokaṃ jayati ya evaṃ veda taddhaika āhuḥ sūryam eva sarvāsām purastāt purastād ājyena pariyajet tad āsu sarvāsu mithunaṃ dadhātīti tad u vā āhur jāmi vā etad yajñe kriyate yatra samānībhyām ṛgbhyāṃ samāne 'han yajatīti yadi ha vā api bahvya iva jāyāḥ patir vāva tāsām mithunaṃ tad yad āsāṃ sūryam purastād yajati tad āsu sarvāsu mithunaṃ dadhāti

3.48.5

ता या इमास् ता अमूर् या अमूस् ता इमा अन्यतराभिर् वाव तं कामम् आप्नोति य एतासूभयीषु

tā yā imās tā amūr yā amūs tā imā anyatarābhir vāva taṃ kāmam āpnoti ya etāsūbhayīṣu

3.48.6

ता उभयीर् गतश्रियः प्रजातिकामस्य संनिर्वपेत्

tā ubhayīr gataśriyaḥ prajātikāmasya saṃnirvapet

3.48.7

न त्व् एषिष्यमाणस्य

na tv eṣiṣyamāṇasya

3.48.8

यद् एना एषिष्यमाणस्य संनिर्वपेद् ईश्वरो हास्य वित्ते देवा अरन्तोर् यद् वा अयम् आत्मने ऽलम् अमंस्तेति

yad enā eṣiṣyamāṇasya saṃnirvaped īśvaro hāsya vitte devā arantor yad vā ayam ātmane 'lam amaṃsteti

3.48.9

ता ह शुचिवृक्षो गौपलायनो वृद्धद्युम्नस्याभिप्रतारिणस्योभयीर् यज्ञे संनिरुवाप तस्य ह रथगृत्सं गाहमानं दृष्ट्वोवाचेत्थम् अहम् अस्य राजन्यस्य देविकाश् च देवीश् चोभयीर् यज्ञे सममादयं यद् अस्येत्थं रथगृत्सो गाहत इति चतुःषष्टिः कवचिनः शश्वद्धास्य ते पुत्रनप्तार आसुः

tā ha śucivṛkṣo gaupalāyano vṛddhadyumnasyābhipratāriṇasyobhayīr yajñe saṃniruvāpa tasya ha rathagṛtsaṃ gāhamānaṃ dṛṣṭvovācettham aham asya rājanyasya devikāś ca devīś cobhayīr yajñe samamādayaṃ yad asyetthaṃ rathagṛtso gāhata iti catuḥṣaṣṭiḥ kavacinaḥ śaśvaddhāsya te putranaptāra āsuḥ

3.49.1

अग्निष्टोमं वै देवा अश्रयन्तोक्थान्य् असुरास् ते समावद्वीर्या एवासन् न व्यावर्तन्त तान् भरद्वाज ऋषीणाम् अपश्यद् इमे वा असुरा उक्थेषु श्रितास् तान् एषां न कश्चन पश्यतीति सो ऽग्निम् उदह्वयत्

agniṣṭomaṃ vai devā aśrayantokthāny asurās te samāvadvīryā evāsan na vyāvartanta tān bharadvāja ṛṣīṇām apaśyad ime vā asurā uktheṣu śritās tān eṣāṃ na kaścana paśyatīti so 'gnim udahvayat

3.49.2

एह्य् ऊ षु ब्रवाणि ते ऽग्न इत्थेतरा गिर इति

ehy ū ṣu bravāṇi te 'gna itthetarā gira iti

3.49.3

असुर्या ह वा इतरा गिरः

asuryā ha vā itarā giraḥ

3.49.4

सो ऽग्निर् उपोत्तिष्ठन्न् अब्रवीत् किं स्विद् एव मह्यं कृशो दीर्घः पलितो वक्ष्यतीति

so 'gnir upottiṣṭhann abravīt kiṃ svid eva mahyaṃ kṛśo dīrghaḥ palito vakṣyatīti

3.49.5

भरद्वाजो ह वै कृशो दीर्घः पलित आस

bharadvājo ha vai kṛśo dīrghaḥ palita āsa

3.49.6

सो ऽब्रवीद् इमे वा असुरा उक्थेषु श्रितास् तान् वो न कश्चन पश्यतीति

so 'bravīd ime vā asurā uktheṣu śritās tān vo na kaścana paśyatīti

3.49.7

तान् अग्निर् अश्वो भूत्वाभ्यत्यद्रवद् यद् अग्निर् अश्वो भूत्वाभ्यत्यद्रवत् तत् साकमश्वं सामाभवत् तत् साकमश्वस्य साकमश्वत्वम्

tān agnir aśvo bhūtvābhyatyadravad yad agnir aśvo bhūtvābhyatyadravat tat sākamaśvaṃ sāmābhavat tat sākamaśvasya sākamaśvatvam

Aitareyabrāhmaṇa