3.45.8

तम् आप्त्वाब्रुवंस् तिष्ठस्व नोऽन्नाद्यायेति स नेत्य् अब्रवीत् कथं वस् तिष्ठेयेति तान् ईक्षतैव तम् अब्रुवन् ब्राह्मणेन च नश् छन्दोभिश् च सयुग् भूत्वान्नाद्याय तिष्ठस्वेति तथेति तस्माद्धाप्येतर्हि यज्ञः सयुग् भूत्वा देवेभ्यो हव्यं वहति ब्राह्मणेन च छन्दोभिश् च

tam āptvābruvaṃs tiṣṭhasva no'nnādyāyeti sa nety abravīt kathaṃ vas tiṣṭheyeti tān īkṣataiva tam abruvan brāhmaṇena ca naś chandobhiś ca sayug bhūtvānnādyāya tiṣṭhasveti tatheti tasmāddhāpyetarhi yajñaḥ sayug bhūtvā devebhyo havyaṃ vahati brāhmaṇena ca chandobhiś ca

3.46.1

त्रीणि ह वै यज्ञे क्रियन्ते जग्धं गीर्णं वान्तम्

trīṇi ha vai yajñe kriyante jagdhaṃ gīrṇaṃ vāntam

3.46.2

तद्धैतद् एव जग्धं यद् आशंसमानम् आर्त्विज्यं कारयत उत वा मे दद्याद् उत वा मा वृणीतेति तद्ध तत् पराङ् एव यथा जग्धं न हैव तद् यजमानम् भुनक्ति

taddhaitad eva jagdhaṃ yad āśaṃsamānam ārtvijyaṃ kārayata uta vā me dadyād uta vā mā vṛṇīteti taddha tat parāṅ eva yathā jagdhaṃ na haiva tad yajamānam bhunakti

3.46.3

अथ हैतद् एव गीर्णं यद् बिभ्यद् आर्त्विज्यं कारयत उत वा मा न बाधेतोत वा मे न यज्ञवेशसं कुर्याद् इति तद्ध तत् पराङ् एव यथा गीर्णं न हैव तद् यजमानम् भुनक्ति

atha haitad eva gīrṇaṃ yad bibhyad ārtvijyaṃ kārayata uta vā mā na bādhetota vā me na yajñaveśasaṃ kuryād iti taddha tat parāṅ eva yathā gīrṇaṃ na haiva tad yajamānam bhunakti

3.46.4

अथ हैतद् एव वान्तं यद् अभिशस्यमानम् आर्त्विज्यं कारयते यथा ह वा इदं वान्तान् मनुष्या बीभत्सन्त एवम् तस्माद् देवास् तद्ध तत् पराङ् एव यथा वान्तं न हैव तद् यजमानम् भुनक्ति

atha haitad eva vāntaṃ yad abhiśasyamānam ārtvijyaṃ kārayate yathā ha vā idaṃ vāntān manuṣyā bībhatsanta evam tasmād devās taddha tat parāṅ eva yathā vāntaṃ na haiva tad yajamānam bhunakti

3.46.5

स एतेषां त्रयाणाम् आशाम् नेयात्

sa eteṣāṃ trayāṇām āśām neyāt

3.46.6

तं यद्य् एतेषां त्रयाणाम् एकं चिद् अकामम् अभ्याभवेत् तस्यास्ति वामदेव्यस्य स्तोत्रे प्रायश्चित्तिः

taṃ yady eteṣāṃ trayāṇām ekaṃ cid akāmam abhyābhavet tasyāsti vāmadevyasya stotre prāyaścittiḥ

3.46.7

इदं वा इदं वामदेव्यं यजमानलोको ऽमृतलोकः स्वर्गो लोकः

idaṃ vā idaṃ vāmadevyaṃ yajamānaloko 'mṛtalokaḥ svargo lokaḥ

3.46.8

तत् त्रिभिर् अक्षरैर् न्यूनं तस्य स्तोत्र उपसृप्य त्रेधात्मानं विगृह्णीयात् पु रु ष इति

tat tribhir akṣarair nyūnaṃ tasya stotra upasṛpya tredhātmānaṃ vigṛhṇīyāt pu ru ṣa iti

3.46.9

स एतेषु लोकेष्व् आत्मानं दधात्य् अस्मिन् यजमानलोके ऽस्मिन्न् अमृतलोके ऽस्मिन् स्वर्गे लोके स सर्वां दुरिष्टिम् अत्येति

sa eteṣu lokeṣv ātmānaṃ dadhāty asmin yajamānaloke 'sminn amṛtaloke 'smin svarge loke sa sarvāṃ duriṣṭim atyeti

3.46.10

अपि यदि समृद्धा इव ऋत्विजः स्युर् इति ह स्माहाथ हैतज् जपेद् एवेति

api yadi samṛddhā iva ṛtvijaḥ syur iti ha smāhātha haitaj japed eveti

3.47.1

छन्दांसि वै देवेभ्यो हव्यम् ऊढ्वा श्रान्तानि जघनार्धे यज्ञस्य तिष्ठन्ति यथाश्वो वाश्वतरो वोहिवांस् तिष्ठेद् एवं तेभ्य एतम् मैत्रावरुणम् पशुपुरोﾱआशम् अनु देविकाहवींषि निर्वपेत्

chandāṃsi vai devebhyo havyam ūḍhvā śrāntāni jaghanārdhe yajñasya tiṣṭhanti yathāśvo vāśvataro vohivāṃs tiṣṭhed evaṃ tebhya etam maitrāvaruṇam paśupuroﾱāśam anu devikāhavīṃṣi nirvapet

3.47.2

धात्रे पुरोﾱआशं द्वादशकपालं यो धाता स वषट्कारः

dhātre puroﾱāśaṃ dvādaśakapālaṃ yo dhātā sa vaṣaṭkāraḥ

3.47.3

अनुमत्यै चरुं यानुमतिः सा गायत्री

anumatyai caruṃ yānumatiḥ sā gāyatrī

3.47.4

राकायै चरुं या राका सा त्रिष्टुप्

rākāyai caruṃ yā rākā sā triṣṭup

3.47.5

सिनीवाल्यै चरुं या सिनीवाली सा जगती कुह्वै चरुं या कुहूः सानुष्टुप्

sinīvālyai caruṃ yā sinīvālī sā jagatī kuhvai caruṃ yā kuhūḥ sānuṣṭup

3.47.6

एतानि वाव सर्वाणि छन्दांसि गायत्रं त्रैष्टुभं जागतम् आनुष्टुभम् अन्व् अन्यान्य् एतानि हि यज्ञे प्रतमाम् इव क्रियन्ते

etāni vāva sarvāṇi chandāṃsi gāyatraṃ traiṣṭubhaṃ jāgatam ānuṣṭubham anv anyāny etāni hi yajñe pratamām iva kriyante

3.47.7

एतैर् ह वा अस्य छन्दोभिर् यजतः सर्वैश् छन्दोभिर् इष्टम् भवाति य एवं वेद

etair ha vā asya chandobhir yajataḥ sarvaiś chandobhir iṣṭam bhavāti ya evaṃ veda

3.47.8

तद् वै यद् इदम् आहुः सुधायां ह वै वाजी सुहितो दधातीति छन्दांसि वै तत् सुधायां ह वा एनं छन्दांसि दधति

tad vai yad idam āhuḥ sudhāyāṃ ha vai vājī suhito dadhātīti chandāṃsi vai tat sudhāyāṃ ha vā enaṃ chandāṃsi dadhati

3.47.9

अननुध्यायिनं लोकं जयति य एवं वेद

ananudhyāyinaṃ lokaṃ jayati ya evaṃ veda

Aitareyabrāhmaṇa