3.40.8

पशुर् उपवसथे भवति तम् एवानु ये केच पशुबन्धास् ते सर्वे ऽग्निष्टोममपियन्ति

paśur upavasathe bhavati tam evānu ye keca paśubandhās te sarve 'gniṣṭomamapiyanti

3.40.9

इﾱआदधो नाम यज्ञक्रतुस् तं दध्ना चरन्ति दध्ना दधिघर्मे दधिघर्मम् एवान्व् इﾱआदधो ऽग्निष्टोमम् अप्येति

iﾱādadho nāma yajñakratus taṃ dadhnā caranti dadhnā dadhigharme dadhigharmam evānv iﾱādadho 'gniṣṭomam apyeti

3.41.1

इति नु पुरस्ताद् अथोपरिष्टात् पञ्चदशोक्थ्यस्य स्तोत्राणि पञ्चदश शस्त्राणि स मासो मासधा संवत्सरो विहितः संवत्सरो ऽग्निर् वैश्वानरो ऽग्निर् अग्निष्टोमः संवत्सरम् एवानूक्थ्यो ऽग्निष्टोमम् अप्येत्य् उक्थ्यम् अपियन्तम् अनु वाजपेयो ऽप्येत्य् उक्थ्यो हि स भवति

iti nu purastād athopariṣṭāt pañcadaśokthyasya stotrāṇi pañcadaśa śastrāṇi sa māso māsadhā saṃvatsaro vihitaḥ saṃvatsaro 'gnir vaiśvānaro 'gnir agniṣṭomaḥ saṃvatsaram evānūkthyo 'gniṣṭomam apyety ukthyam apiyantam anu vājapeyo 'pyety ukthyo hi sa bhavati

3.41.2

द्वादश रात्रेः पर्यायाः सर्वे पञ्चदशास् ते द्वौ द्वौ सम्पद्य त्रिंशद् एकविंशं षोﾱअशि साम त्रिवृत् संधिः सा त्रिंशत् स मासस् त्रिंशन् मासस्य रात्रयो मासधा संवत्सरो विहितः संवत्सरो ऽग्निर् वैश्वानरो ऽग्निर् अग्निष्टोमः संवत्सरम् एवान्व् अतिरात्रो ऽग्निष्टोमम् अप्येत्य् अतिरात्रम् अपियन्तम् अन्व् अप्तोर्यामो ऽप्येत्य् अतिरात्रो हि स भवति

dvādaśa rātreḥ paryāyāḥ sarve pañcadaśās te dvau dvau sampadya triṃśad ekaviṃśaṃ ṣoﾱaśi sāma trivṛt saṃdhiḥ sā triṃśat sa māsas triṃśan māsasya rātrayo māsadhā saṃvatsaro vihitaḥ saṃvatsaro 'gnir vaiśvānaro 'gnir agniṣṭomaḥ saṃvatsaram evānv atirātro 'gniṣṭomam apyety atirātram apiyantam anv aptoryāmo 'pyety atirātro hi sa bhavati

3.41.3

एतद् वै ये च पुरस्ताद् ये चोपरिष्टाद् यज्ञक्रतवस् ते सर्वे ऽग्निष्टोमम् अपियन्ति

etad vai ye ca purastād ye copariṣṭād yajñakratavas te sarve 'gniṣṭomam apiyanti

3.41.4

तस्य संस्तुतस्य नवतिशतं स्तोत्रियाः सा या नवतिस् ते दश त्रिवृतो ऽथ या नवतिस् ते दशाथ या दश तासाम् एका स्तोत्रियोदेति त्रिवृत् परिशिष्यते सो ऽसावेकविंशो ऽध्याहितस् तपति विषुवान् वा एष स्तोमानां दश वा एतस्माद् अर्वाञ्चस् त्रिवृतो दश पराञ्चो मध्य एष एकविंश उभयतो ऽध्याहितस् तपति तद् यासौ स्तोत्रियोदेति सैतस्मिन्न् अध्यूﾱहा स यजमानस् तद् दैवं क्षत्रं सहो बलम्

tasya saṃstutasya navatiśataṃ stotriyāḥ sā yā navatis te daśa trivṛto 'tha yā navatis te daśātha yā daśa tāsām ekā stotriyodeti trivṛt pariśiṣyate so 'sāvekaviṃśo 'dhyāhitas tapati viṣuvān vā eṣa stomānāṃ daśa vā etasmād arvāñcas trivṛto daśa parāñco madhya eṣa ekaviṃśa ubhayato 'dhyāhitas tapati tad yāsau stotriyodeti saitasminn adhyūﾱhā sa yajamānas tad daivaṃ kṣatraṃ saho balam

3.41.5

अश्नुते ह वै दैवं क्षत्रं सहो बलम् एतस्य ह सायुज्यं सरूपतां सलोकताम् अश्नुते य एवं वेद

aśnute ha vai daivaṃ kṣatraṃ saho balam etasya ha sāyujyaṃ sarūpatāṃ salokatām aśnute ya evaṃ veda

3.42.1

देवा वा असुरैर् विजिग्याना ऊर्ध्वाः स्वर्गं लोकम् आयन् सो ऽग्निर् दिविस्पृग् ऊर्ध्व उदश्रयत स स्वर्गस्य लोकस्य द्वारम् अवृणोद् अग्निर् वै स्वर्गस्य लोकस्याधिपतिस् तं वसवः प्रथमा आगच्छंस् त एनम् अब्रुवन्न् अति नो ऽर्जस्य् आकाशं नः कुर्व् इति स नास्तुतो ऽतिस्रक्ष्य इत्य् अब्रवीत् स्तुत नु मेति तथेति तं ते त्रिवृता स्तोमेनास्तुवंस् तान् स्तुतो ऽत्यार्जत ते यथालोकम् अगच्छन्

devā vā asurair vijigyānā ūrdhvāḥ svargaṃ lokam āyan so 'gnir divispṛg ūrdhva udaśrayata sa svargasya lokasya dvāram avṛṇod agnir vai svargasya lokasyādhipatis taṃ vasavaḥ prathamā āgacchaṃs ta enam abruvann ati no 'rjasy ākāśaṃ naḥ kurv iti sa nāstuto 'tisrakṣya ity abravīt stuta nu meti tatheti taṃ te trivṛtā stomenāstuvaṃs tān stuto 'tyārjata te yathālokam agacchan

3.42.2

तं रुद्रा आगच्छंस् त एनम् अब्रुवन्न् अति नो ऽर्जस्य् आकाशं नः कुर्व् इति स नास्तुतो ऽतिस्रक्ष्य इत्य् अब्रवीत् स्तुत नु मेति तथेति तं ते पञ्चदशेन स्तोमेनास्तुवंस् तान् स्तुतो ऽत्यार्जत ते यथालोकम् अगच्छन्

taṃ rudrā āgacchaṃs ta enam abruvann ati no 'rjasy ākāśaṃ naḥ kurv iti sa nāstuto 'tisrakṣya ity abravīt stuta nu meti tatheti taṃ te pañcadaśena stomenāstuvaṃs tān stuto 'tyārjata te yathālokam agacchan

3.42.3

तम् आदित्या आगच्छंस् त एनम् अब्रुवन्न् अति नो ऽर्जस्य् आकाशं नः कुर्व् इति स नास्तुतो ऽतिस्रक्ष्य इत्य् अब्रवीत् स्तुत नु मेति तथेति तं ते सप्तदशेन स्तोमेनास्तुवंस् तान् स्तुतो ऽत्यार्जत ते यथालोकम् अगच्छन्

tam ādityā āgacchaṃs ta enam abruvann ati no 'rjasy ākāśaṃ naḥ kurv iti sa nāstuto 'tisrakṣya ity abravīt stuta nu meti tatheti taṃ te saptadaśena stomenāstuvaṃs tān stuto 'tyārjata te yathālokam agacchan

3.42.4

तं विश्वे देवा आगच्छंस् त एनम् अब्रुवन्न् अति नो ऽर्जस्य् आकाशं नः कुर्व् इति स नास्तुतो ऽतिस्रक्ष्य इत्य् अब्रवीत् स्तुत नु मेति तथेति तं त एकविंशेन स्तोमेनास्तुवंस् तान् स्तुतो ऽत्यार्जत ते यथालोकम् अगच्छन्

taṃ viśve devā āgacchaṃs ta enam abruvann ati no 'rjasy ākāśaṃ naḥ kurv iti sa nāstuto 'tisrakṣya ity abravīt stuta nu meti tatheti taṃ ta ekaviṃśena stomenāstuvaṃs tān stuto 'tyārjata te yathālokam agacchan

3.42.5

एकैकेन वै तं देवाः स्तोमेनास्तुवंस् तान् स्तुतो ऽत्यार्जत ते यथालोकम् अगच्छन्

ekaikena vai taṃ devāḥ stomenāstuvaṃs tān stuto 'tyārjata te yathālokam agacchan

3.42.6

अथ हैनम् एष एतैः सर्वैः स्तोमैः स्तौति यो यजते

atha hainam eṣa etaiḥ sarvaiḥ stomaiḥ stauti yo yajate

3.42.7

यश् चैनम् एवं वेदाती तु

yaś cainam evaṃ vedātī tu

3.42.8

अति ह वा एनम् अर्जते स्वर्गं लोकम् अभि य एवं वेद

ati ha vā enam arjate svargaṃ lokam abhi ya evaṃ veda

3.43.1

स वा एषो ऽग्निर् एव यद् अग्निष्टोमस् तं यद् अस्तुवंस् तस्माद् अग्निस्तोमस् तम् अग्निस्तोमं सन्तम् अग्निष्टोम इत्य् आचक्षते परोक्षेण परोक्षप्रिया इव हि देवाः

sa vā eṣo 'gnir eva yad agniṣṭomas taṃ yad astuvaṃs tasmād agnistomas tam agnistomaṃ santam agniṣṭoma ity ācakṣate parokṣeṇa parokṣapriyā iva hi devāḥ

3.43.2

तं यच् चतुष्टया देवाश् चतुर्भिः स्तोमैर् अस्तुवंस् तस्माच्चतुस्तोमस् तं चतुस्तोमं सन्तं चतुष्टोम इत्य् आचक्षते परोक्षेण परोक्षप्रिया इव हि देवाः

taṃ yac catuṣṭayā devāś caturbhiḥ stomair astuvaṃs tasmāccatustomas taṃ catustomaṃ santaṃ catuṣṭoma ity ācakṣate parokṣeṇa parokṣapriyā iva hi devāḥ

3.43.3

अथ यद् एनम् ऊर्ध्वं सन्तं ज्योतिर् भूतम् अस्तुवंस् तस्माज् ज्योतिस्तोमस् तं ज्योतिस्तोमं सन्तं ज्योतिष्टोम इत्य् आचक्षते परोक्षेण परोक्षप्रिया इव हि देवाः

atha yad enam ūrdhvaṃ santaṃ jyotir bhūtam astuvaṃs tasmāj jyotistomas taṃ jyotistomaṃ santaṃ jyotiṣṭoma ity ācakṣate parokṣeṇa parokṣapriyā iva hi devāḥ

3.43.4

स वा एषो ऽपूर्वो ऽनपरो यज्ञक्रतुर् यथा रथचक्रम् अनन्तम् एवं यद् अग्निष्टोमस् तस्य यथैव प्रायणं तथोदयनम्

sa vā eṣo 'pūrvo 'naparo yajñakratur yathā rathacakram anantam evaṃ yad agniṣṭomas tasya yathaiva prāyaṇaṃ tathodayanam

3.43.5

तद् एषाभि यज्ञगाथा गीयते यद् अस्य पूर्वम् अपरं तद् अस्य यद् व् अस्यापरं तद् व् अस्य पूर्वम् अहेर् इव सर्पणं शाकलस्य न विजानन्ति यतरत् परस्ताद् इति

tad eṣābhi yajñagāthā gīyate yad asya pūrvam aparaṃ tad asya yad v asyāparaṃ tad v asya pūrvam aher iva sarpaṇaṃ śākalasya na vijānanti yatarat parastād iti

Aitareyabrāhmaṇa