3.38.8

एवा न इन्द्रो मघवा विरप्शीत्य् उत्तमया परिदधातीयं वा इन्द्रो मघवा विरप्शी

evā na indro maghavā virapśīty uttamayā paridadhātīyaṃ vā indro maghavā virapśī

3.38.9

करत् सत्या चर्षणीधृद् अनर्वेतीयं वै सत्या चर्षणीधृद् अनर्वा

karat satyā carṣaṇīdhṛd anarvetīyaṃ vai satyā carṣaṇīdhṛd anarvā

3.38.10

त्वं राजा जनुषां धेह्य् अस्मे इतीयं वै राजा जनुषाम्

tvaṃ rājā januṣāṃ dhehy asme itīyaṃ vai rājā januṣām

3.38.11

अधि श्रवो माहिनं यज् जरित्र इतीयं वै माहिनं यज्ञः श्रवो यजमानो जरिता यजमानायैवैताम् आशिषम् आशास्ते

adhi śravo māhinaṃ yaj jaritra itīyaṃ vai māhinaṃ yajñaḥ śravo yajamāno jaritā yajamānāyaivaitām āśiṣam āśāste

3.38.12

तद् उपस्पृशन् भूमिम् परिदध्यात् तद् यस्याम् एव यज्ञं संभरति तस्याम् एवैनं तद् अन्ततः प्रतिष्ठापयति

tad upaspṛśan bhūmim paridadhyāt tad yasyām eva yajñaṃ saṃbharati tasyām evainaṃ tad antataḥ pratiṣṭhāpayati

3.38.13

अग्ने मरुद्भिः शुभयद्भिर् ऋक्वभिर् इत्य् आग्निमारुतम् उक्थं शस्त्वाग्निमारुत्या यजति यथाभागं तद् देवताः प्रीणाति प्रीणाति

agne marudbhiḥ śubhayadbhir ṛkvabhir ity āgnimārutam ukthaṃ śastvāgnimārutyā yajati yathābhāgaṃ tad devatāḥ prīṇāti prīṇāti

3.39.1

देवा वा असुरैर् युद्धम् उपप्रायन् विजयाय तान् अग्निर् नान्वकामयतैतुं तं देवा अब्रुवन्न् अपि त्वम् एह्य् अस्माकं वै त्वमेको ऽसीति स नास्तुतो ऽन्वेष्यामीत्य् अब्रवीत् स्तुत नु मेति तं ते समुत्क्रम्योपनिवृत्यास्तुवंस् तान् स्तुतो ऽनुप्रैत्

devā vā asurair yuddham upaprāyan vijayāya tān agnir nānvakāmayataituṃ taṃ devā abruvann api tvam ehy asmākaṃ vai tvameko 'sīti sa nāstuto 'nveṣyāmīty abravīt stuta nu meti taṃ te samutkramyopanivṛtyāstuvaṃs tān stuto 'nuprait

3.39.2

स त्रिःश्रेणिर् भूत्वा त्र्यनीको ऽसुरान् युद्धम् उपप्रायद् विजयाय त्रिःश्रेणिर् इति छन्दांस्य् एव श्रेणीर् अकुरुत त्र्यनीक इति सवनान्य् एवानीकानि तान् असंभाव्यम् पराभावयत् ततो वै देवा अभवन् परासुराः

sa triḥśreṇir bhūtvā tryanīko 'surān yuddham upaprāyad vijayāya triḥśreṇir iti chandāṃsy eva śreṇīr akuruta tryanīka iti savanāny evānīkāni tān asaṃbhāvyam parābhāvayat tato vai devā abhavan parāsurāḥ

3.39.3

भवत्य् आत्मना परास्य द्विषन् पाप्मा भ्रातृव्यो भवति य एवं वेद

bhavaty ātmanā parāsya dviṣan pāpmā bhrātṛvyo bhavati ya evaṃ veda

3.39.4

सा वा एषा गायत्र्य् एव यद् अग्निष्टोमश् चतुर्विंशत्यक्षरा वै गायत्री चतुर्विंशतिरग्निष्टोमस्य स्तुतशस्त्राणि

sā vā eṣā gāyatry eva yad agniṣṭomaś caturviṃśatyakṣarā vai gāyatrī caturviṃśatiragniṣṭomasya stutaśastrāṇi

3.39.5

तद् वै यद् इदम् आहुः सुधायां ह वै वाजी सुहितो दधातीति गायत्री वै तन् न ह वै गायत्री क्षमा रमत ऊर्ध्वा ह वा एषा यजमानमादाय स्वर् एतीत्य् अग्निष्टोमो वै तन् न ह वा अग्निष्टोमः क्षमा रमत ऊर्ध्वो ह वा एष यजमानम् आदाय स्वर् एति

tad vai yad idam āhuḥ sudhāyāṃ ha vai vājī suhito dadhātīti gāyatrī vai tan na ha vai gāyatrī kṣamā ramata ūrdhvā ha vā eṣā yajamānamādāya svar etīty agniṣṭomo vai tan na ha vā agniṣṭomaḥ kṣamā ramata ūrdhvo ha vā eṣa yajamānam ādāya svar eti

3.39.6

स वा एष संवत्सर एव यद् अग्निष्टोमश् चतुर्विंशत्यर्धमासो वै संवत्सरश् चतुर्विंशतिर् अग्निष्टोमस्य स्तुतशस्त्राणि

sa vā eṣa saṃvatsara eva yad agniṣṭomaś caturviṃśatyardhamāso vai saṃvatsaraś caturviṃśatir agniṣṭomasya stutaśastrāṇi

3.39.7

तं यथा समुद्रं स्रोत्या एवं सर्वे यज्ञक्रतवो ऽपियन्ति

taṃ yathā samudraṃ srotyā evaṃ sarve yajñakratavo 'piyanti

3.40.1

दीक्षणीयेष्टिस् तायते ताम् एवानु याः काश्चेष्टयस् ताः सर्वा अग्निष्टोमम् अपियन्ति

dīkṣaṇīyeṣṭis tāyate tām evānu yāḥ kāśceṣṭayas tāḥ sarvā agniṣṭomam apiyanti

3.40.2

इﾱआम् उपह्वयत इﾱआविधा वै पाकयज्ञा इﾱआम् एवानु ये केच पाकयज्ञास् ते सर्वे ऽग्निष्टोमम् अपियन्ति

iﾱām upahvayata iﾱāvidhā vai pākayajñā iﾱām evānu ye keca pākayajñās te sarve 'gniṣṭomam apiyanti

3.40.3

सायम्प्रातर् अग्निहोत्रं जुह्वति सायम्प्रातर् व्रतम् प्रयच्छन्ति स्वाहाकारेणाग्निहोत्रं जुह्वति स्वाहाकारेण व्रतम् प्रयच्छन्ति स्वाहाकारम् एवान्व् अग्निहोत्रम् अग्निष्टोमम् अप्येति

sāyamprātar agnihotraṃ juhvati sāyamprātar vratam prayacchanti svāhākāreṇāgnihotraṃ juhvati svāhākāreṇa vratam prayacchanti svāhākāram evānv agnihotram agniṣṭomam apyeti

3.40.4

पञ्चदश प्रायणीये सामिधेनीर् अन्वाह पञ्चदश दर्शपूर्णमासयोः प्रायणीयम् एवानु दर्शपूर्णमासाव् अग्निष्टोमम् अपीतः

pañcadaśa prāyaṇīye sāmidhenīr anvāha pañcadaśa darśapūrṇamāsayoḥ prāyaṇīyam evānu darśapūrṇamāsāv agniṣṭomam apītaḥ

3.40.5

सोमं राजानं क्रीणन्त्य् औषधो वै सोमो राजौषधिभिस् तम् भिषज्यन्ति यम् भिषज्यन्ति सोमम् एव राजानं क्रीयमाणम् अनु यानि कानिच भेषजानि तानि सर्वाण्य् अग्निष्टोमम् अपियन्ति

somaṃ rājānaṃ krīṇanty auṣadho vai somo rājauṣadhibhis tam bhiṣajyanti yam bhiṣajyanti somam eva rājānaṃ krīyamāṇam anu yāni kānica bheṣajāni tāni sarvāṇy agniṣṭomam apiyanti

3.40.6

अग्निम् आतिथ्ये मन्थन्त्य् अग्निं चातुर्मास्येष्व् आतिथ्यम् एवानु चातुर्मास्यान्य् अग्निष्टोमम् अपियन्ति

agnim ātithye manthanty agniṃ cāturmāsyeṣv ātithyam evānu cāturmāsyāny agniṣṭomam apiyanti

3.40.7

पयसा प्रवर्ग्ये चरन्ति पयसा दाक्षायणयज्ञे प्रवर्ग्यम् एवानु दाक्षायणयज्ञो ऽग्निष्टोमम् अप्येति

payasā pravargye caranti payasā dākṣāyaṇayajñe pravargyam evānu dākṣāyaṇayajño 'gniṣṭomam apyeti

Aitareyabrāhmaṇa