1.1.4.15

वाचम् एवास्मिंस् तद् दधाति य एवं वेद येषां चैवं विद्वान् एतद्धोता शंसति

vācam evāsmiṃs tad dadhāti ya evaṃ veda yeṣāṃ caivaṃ vidvān etaddhotā śaṃsati

1.1.4.16

यज्ञं वष्ट्व् इति यद् आह यज्ञं वहत्व् इत्य् एव तद् आह

yajñaṃ vaṣṭv iti yad āha yajñaṃ vahatv ity eva tad āha

1.1.4.17

ताः पराग्वचनेनैकविंशतिर् भवन्त्य् एकविंशो ऽयं पुरुषो दश हस्त्या अङ्गुलयो दश पाद्या आत्मैकविंशस् तम् इमम् आत्मानम् एकविंशं संस्कुरुते

tāḥ parāgvacanenaikaviṃśatir bhavanty ekaviṃśo 'yaṃ puruṣo daśa hastyā aṅgulayo daśa pādyā ātmaikaviṃśas tam imam ātmānam ekaviṃśaṃ saṃskurute

1.1.4.18

तास् त्रिः प्रथमया त्रिर् उत्तमया पञ्चविंशतिर् भवन्ति पञ्चविंश आत्मा पञ्चविंशः प्रजापतिर् दश हस्त्या अङ्गुलयो दश पाद्या द्वा ऊरू द्वौ बाहू आत्मैव पञ्चविंशस् तम् इमम् आत्मानं पञ्चविंशं संस्कुरुते

tās triḥ prathamayā trir uttamayā pañcaviṃśatir bhavanti pañcaviṃśa ātmā pañcaviṃśaḥ prajāpatir daśa hastyā aṅgulayo daśa pādyā dvā ūrū dvau bāhū ātmaiva pañcaviṃśas tam imam ātmānaṃ pañcaviṃśaṃ saṃskurute

1.1.4.19

अथो पञ्चविंशं वा एतद् अहः पञ्चविंश एतस्याह्न स्तोमस् तत् समेन समं प्रतिपद्यते तस्माद् द्वे एव पञ्चविंशतिर् भवन्ति भवन्ति

atho pañcaviṃśaṃ vā etad ahaḥ pañcaviṃśa etasyāhna stomas tat samena samaṃ pratipadyate tasmād dve eva pañcaviṃśatir bhavanti bhavanti

1.2.1.1

आ त्वा रथं यथोतय इदं वसो सुतम् अन्ध इति मरुत्वतीयस्य प्रतिपदनुचरौ

ā tvā rathaṃ yathotaya idaṃ vaso sutam andha iti marutvatīyasya pratipadanucarau

1.2.1.2

ऐकाहिकौ रूपसमृद्धौ बहु वा एतस्मिन्न् अहनि किञ्च किञ्च वारणं क्रियते शान्त्या एव शान्तिर् वै प्रतिष्ठैकाहः शान्त्याम् एव तत् प्रतिष्ठायाम् अन्ततः प्रतितिष्ठन्ति

aikāhikau rūpasamṛddhau bahu vā etasminn ahani kiñca kiñca vāraṇaṃ kriyate śāntyā eva śāntir vai pratiṣṭhaikāhaḥ śāntyām eva tat pratiṣṭhāyām antataḥ pratitiṣṭhanti

1.2.1.3

प्रतितिष्ठति य एवं वेद येषां चैवं विद्वान् एतद्धोता शंसति

pratitiṣṭhati ya evaṃ veda yeṣāṃ caivaṃ vidvān etaddhotā śaṃsati

1.2.1.4

इन्द्र नेदीय एद् इहि प्र सू तिरा शचीभिर् ये त उक्थिन इत्य् उक्थं वा एतद् अहर् उक्थवद् रूपसमृद्धम् एतस्याह्नो रूपम्

indra nedīya ed ihi pra sū tirā śacībhir ye ta ukthina ity ukthaṃ vā etad ahar ukthavad rūpasamṛddham etasyāhno rūpam

1.2.1.5

प्रैतु ब्रह्मणस्पतिर् अच्छा वीरम् इति वीरवद् रूपसमृद्धम् एतस्याह्नो रूपम्

praitu brahmaṇaspatir acchā vīram iti vīravad rūpasamṛddham etasyāhno rūpam

1.2.1.6

उत्तिष्ठ ब्रह्मणस्पते सुवीर्यम् इति वीर्यवद् रूपसमृद्धम् एतस्याह्नो रूपम्

uttiṣṭha brahmaṇaspate suvīryam iti vīryavad rūpasamṛddham etasyāhno rūpam

1.2.1.7

प्र नूनं ब्रह्मणस्पतिर् मन्त्रं वदत्य् उक्थ्यम् इत्य् उक्थं वा एतद् अहर् उक्थवद् रूपसमृद्धम् एतस्याह्नो रूपम्

pra nūnaṃ brahmaṇaspatir mantraṃ vadaty ukthyam ity ukthaṃ vā etad ahar ukthavad rūpasamṛddham etasyāhno rūpam

1.2.1.8

अग्निर् नेता स वृत्रहेति वार्त्रघ्नम् इन्द्ररूपम् ऐन्द्रम् एतद् अहर् एतस्याह्नो रूपम्

agnir netā sa vṛtraheti vārtraghnam indrarūpam aindram etad ahar etasyāhno rūpam

1.2.1.9

त्वं सोम क्रतुभिः सुक्रतुर् भूस् त्वं वृषा वृषत्वेभिर् महित्वेति वृषण्वद् वा इन्द्रस्य रूपम् ऐन्द्रम् एतद् अहर् एतस्याह्नो रूपम्

tvaṃ soma kratubhiḥ sukratur bhūs tvaṃ vṛṣā vṛṣatvebhir mahitveti vṛṣaṇvad vā indrasya rūpam aindram etad ahar etasyāhno rūpam

1.2.1.10

पिन्वन्त्य् अपो ऽत्यं न मिहे वि नयन्ति वाजिनम् इति वाजिमद् वा इन्द्रस्य रूपम् ऐन्द्रम् एतद् अहर् एतस्याह्नो रूपम्

pinvanty apo 'tyaṃ na mihe vi nayanti vājinam iti vājimad vā indrasya rūpam aindram etad ahar etasyāhno rūpam

1.2.1.11

अथो उत्सं दुहन्ति स्तनयन्तम् अक्षितम् इति स्तनयद् वा इन्द्रस्य रूपम् ऐन्द्रम् एतद् अहर् एतस्याह्नो रूपम्

atho utsaṃ duhanti stanayantam akṣitam iti stanayad vā indrasya rūpam aindram etad ahar etasyāhno rūpam

1.2.1.12

प्र व इन्द्राय बृहत इति यद् वै बृहत् तन् महन् महद्वद् रूपसमृद्धम् एतस्याह्नो रूपम्

pra va indrāya bṛhata iti yad vai bṛhat tan mahan mahadvad rūpasamṛddham etasyāhno rūpam

1.2.1.13

बृहद् इन्द्राय गायतेति यद् वै बृहत् तन् महन् महद्वद् रूपसमृद्धम् एतस्याह्नो रूपम्

bṛhad indrāya gāyateti yad vai bṛhat tan mahan mahadvad rūpasamṛddham etasyāhno rūpam

1.2.1.14

नकिः सुदासो रथं पर्य् आस न रीरमद् इति पर्यस्तवद् रान्तिमद् रूपसमृद्धम् एतस्याह्नो रूपम्

nakiḥ sudāso rathaṃ pary āsa na rīramad iti paryastavad rāntimad rūpasamṛddham etasyāhno rūpam

1.2.1.15

सर्वान् प्रगाथाञ्छंसति सर्वेषाम् अह्नाम् आप्त्यै सर्वेषाम् उक्थानां सर्वेषां पृष्ठानां सर्वेषां शस्त्राणां सर्वेषां प्रौगाणां सर्वेषां सवनानां

sarvān pragāthāñchaṃsati sarveṣām ahnām āptyai sarveṣām ukthānāṃ sarveṣāṃ pṛṣṭhānāṃ sarveṣāṃ śastrāṇāṃ sarveṣāṃ praugāṇāṃ sarveṣāṃ savanānāṃ

Aitareya-Āraṇyaka