1.5.2.7

अथावपनम् एते अन्तरेणैन्द्रीणां दशतीनां त्रिष्टुब्जगतीनां बृहतीसम्पन्नानां यावतीर् आवपन्ते तावन्त्य् ऊर्ध्वम् आयुषो वर्षाणि जीवन्त्य् एतेन हैवावपनेनायुर् आप्यते

athāvapanam ete antareṇaindrīṇāṃ daśatīnāṃ triṣṭubjagatīnāṃ bṛhatīsampannānāṃ yāvatīr āvapante tāvanty ūrdhvam āyuṣo varṣāṇi jīvanty etena haivāvapanenāyur āpyate

1.5.2.8

प्रजां मे पशवो ऽर्जयन्न् इति त्व् एव सजनीयम् अनुशंसति

prajāṃ me paśavo 'rjayann iti tv eva sajanīyam anuśaṃsati

1.5.2.9

तार्क्ष्यं शंसति स्वस्त्ययनं वै तार्क्ष्यः स्वस्तितायै स्वस्त्ययनम् एव तत् कुरुते

tārkṣyaṃ śaṃsati svastyayanaṃ vai tārkṣyaḥ svastitāyai svastyayanam eva tat kurute

1.5.2.10

एकपदां शंसत्य् एकधेदं सर्वम् असानीत्य् अथो सर्वां छन्दस्कृतिम् आप्नवानीति

ekapadāṃ śaṃsaty ekadhedaṃ sarvam asānīty atho sarvāṃ chandaskṛtim āpnavānīti

1.5.2.11

इन्द्रं विश्वा अवीवृधन्न् इति पदानुषङ्गास् ताः सप्तानुषजति सप्त वै शीर्षन् प्राणाः शीर्षन्न् एव तत् प्राणान् दधात्य् अष्टमीं नानुषजति वाग् अष्टमी नेन् मे वाक् प्राणैर् अनुषक्तासद् इति तस्माद् उ सा वाक् समानायतना प्राणैः सत्य् अननुषक्ता

indraṃ viśvā avīvṛdhann iti padānuṣaṅgās tāḥ saptānuṣajati sapta vai śīrṣan prāṇāḥ śīrṣann eva tat prāṇān dadhāty aṣṭamīṃ nānuṣajati vāg aṣṭamī nen me vāk prāṇair anuṣaktāsad iti tasmād u sā vāk samānāyatanā prāṇaiḥ saty ananuṣaktā

1.5.2.12

विराजः शंसत्य् अन्नं वै विराजो ऽन्नाद्यस्यावरुद्ध्यै

virājaḥ śaṃsaty annaṃ vai virājo 'nnādyasyāvaruddhyai

1.5.2.13

वासिष्ठेन परिदधाति वसिष्ठो ऽसानीति

vāsiṣṭhena paridadhāti vasiṣṭho 'sānīti

1.5.2.14

एष स्तोमो मह उग्राय वाह इति महद्वत्या रूपसमृद्धया

eṣa stomo maha ugrāya vāha iti mahadvatyā rūpasamṛddhayā

1.5.2.15

धुरीवात्यो न वाजयन्न् अधायीत्य् अन्तो वै धुर् अन्त एतद् अहर् एतस्याह्नो रूपम्

dhurīvātyo na vājayann adhāyīty anto vai dhur anta etad ahar etasyāhno rūpam

1.5.2.16

इन्द्र त्वायम् अर्क ईट्टे वसूनाम् इत्य् अर्कवत्या रूपसमृद्धया

indra tvāyam arka īṭṭe vasūnām ity arkavatyā rūpasamṛddhayā

1.5.2.17

दिवीव द्याम् अधि नः श्रोमतं धा इति यत्र ह क्व च ब्रह्मण्या वाग् उद्यते तद्धास्य कीर्तिर् भवति यत्रैवं विद्वान् एतया परिदधाति तस्माद् एवं विद्वान् एतयैव परिदध्यात्

divīva dyām adhi naḥ śromataṃ dhā iti yatra ha kva ca brahmaṇyā vāg udyate taddhāsya kīrtir bhavati yatraivaṃ vidvān etayā paridadhāti tasmād evaṃ vidvān etayaiva paridadhyāt

1.5.3.1

तत् सवितुर् वृणीमहे ऽद्या नो देव सवितर् इति वैश्वदेवस्य प्रतिपदनुचराव् ऐकाहिकौ रूपसमृद्धौ बहु वा एतस्मिन्न् अहनि किञ्च किञ्च वारणं क्रियते शान्त्या एव शान्तिर् वै प्रतिष्ठैकाहः शान्त्याम् एव तत् प्रतिष्ठायाम् अन्ततः प्रतितिष्ठन्ति

tat savitur vṛṇīmahe 'dyā no deva savitar iti vaiśvadevasya pratipadanucarāv aikāhikau rūpasamṛddhau bahu vā etasminn ahani kiñca kiñca vāraṇaṃ kriyate śāntyā eva śāntir vai pratiṣṭhaikāhaḥ śāntyām eva tat pratiṣṭhāyām antataḥ pratitiṣṭhanti

1.5.3.2

प्रतितिष्ठति य एवं वेद येषां चैवं विद्वान् एतद्धोता शंसति

pratitiṣṭhati ya evaṃ veda yeṣāṃ caivaṃ vidvān etaddhotā śaṃsati

1.5.3.3

तद् देवस्य सवितुर् वार्यं महद् इति सावित्रम् अन्तो वै महद् अन्त एतद् अहर् एतस्याह्नो रूपम्

tad devasya savitur vāryaṃ mahad iti sāvitram anto vai mahad anta etad ahar etasyāhno rūpam

1.5.3.4

कतरा पूर्वा कतरापरायोर् इति द्यावापृथिवीयं समानोदर्कं समानोदर्कं वा एतद् अहर् एतस्याह्नो रूपम्

katarā pūrvā katarāparāyor iti dyāvāpṛthivīyaṃ samānodarkaṃ samānodarkaṃ vā etad ahar etasyāhno rūpam

1.5.3.5

अनश्वो जातो अनभीशुर् उक्थ्य इत्य् आर्भवम्

anaśvo jāto anabhīśur ukthya ity ārbhavam

1.5.3.6

रथस् त्रिचक्र इति यद् एतत् त्रिवत् तद् अन्तो वै त्रिवद् अन्त एतद् अहर् एतस्याह्नो रूपम्

rathas tricakra iti yad etat trivat tad anto vai trivad anta etad ahar etasyāhno rūpam

1.5.3.7

अस्य वामस्य पलितस्य होतुर् इति वैश्वदेवं बहुरूपं बहुरूपम् वा एतद् अहर् एतस्याह्नो रूपम्

asya vāmasya palitasya hotur iti vaiśvadevaṃ bahurūpaṃ bahurūpam vā etad ahar etasyāhno rūpam

1.5.3.8

गौरीर् मिमाय सलिलानि तक्षतीत्य् एतदन्तम्

gaurīr mimāya salilāni takṣatīty etadantam

1.5.3.9

आ नो भद्राः क्रतवो यन्तु विश्वत इति वैश्वदेवं निविद्धानम् ऐकाहिकं रूपसमृद्धं बहु वा एतस्मिन्न् अहनि किञ्च किञ्च वारणं क्रियते शान्त्या एव शान्तिर् वै प्रतिष्ठैकाहः शान्त्याम् एव तत् प्रतिष्ठायाम् अन्ततः प्रतितिष्ठन्ति

ā no bhadrāḥ kratavo yantu viśvata iti vaiśvadevaṃ nividdhānam aikāhikaṃ rūpasamṛddhaṃ bahu vā etasminn ahani kiñca kiñca vāraṇaṃ kriyate śāntyā eva śāntir vai pratiṣṭhaikāhaḥ śāntyām eva tat pratiṣṭhāyām antataḥ pratitiṣṭhanti

Aitareya-Āraṇyaka