2.18

इत्य् आदिमहापुराणे आग्नेये मत्स्यावतारो नाम द्वितीयो ऽध्यायः

ity ādimahāpurāṇe āgneye matsyāvatāro nāma dvitīyo 'dhyāyaḥ

3.1

अग्निर् उवाच

agnir uvāca

3.1.2

वक्ष्ये कूर्मावतारं च श्रुत्वा पापप्रणाशनम्

vakṣye kūrmāvatāraṃ ca śrutvā pāpapraṇāśanam

3.1.3

पुरा देवासुरे युद्धे दैत्यैर् देवाः पराजिताः

purā devāsure yuddhe daityair devāḥ parājitāḥ

3.2

दुर्वाससश् च शापेन निःश्रीकाश् चाभवंस्तदा

durvāsasaś ca śāpena niḥśrīkāś cābhavaṃstadā

3.2.2

स्तुत्वा क्षीराब्धिगं विष्णुम् ऊचुः पालय चासुरात्

stutvā kṣīrābdhigaṃ viṣṇum ūcuḥ pālaya cāsurāt

3.3

ब्रह्मादिकान् हरिः प्राह सन्धिं कुर्वन्तु चासुरैः

brahmādikān hariḥ prāha sandhiṃ kurvantu cāsuraiḥ

3.3.2

क्षीराब्धिमथनार्थं हि अमृतार्थं श्रिये ऽसुराः

kṣīrābdhimathanārthaṃ hi amṛtārthaṃ śriye 'surāḥ

3.4

अरयो ऽपि हि संधेयाः सति कार्यार्थगौरवे

arayo 'pi hi saṃdheyāḥ sati kāryārthagaurave

3.4.2

युष्मानमृतभाजो हि कारयामि न दानवान्

yuṣmānamṛtabhājo hi kārayāmi na dānavān

3.5

मन्थानं मन्दरं कृत्वा नेत्रं कृत्वा तु वासुकिम्

manthānaṃ mandaraṃ kṛtvā netraṃ kṛtvā tu vāsukim

3.5.2

क्षीराब्धिं मत्सहायेन निर्मथध्वम् अतन्द्रिताः

kṣīrābdhiṃ matsahāyena nirmathadhvam atandritāḥ

3.6

विष्णूक्तां संविदं कृत्वा दैत्यैः क्षीराब्धिमागताः

viṣṇūktāṃ saṃvidaṃ kṛtvā daityaiḥ kṣīrābdhimāgatāḥ

3.6.2

ततो मथितुमारब्धाः यतः पुच्छं ततः सुराः

tato mathitumārabdhāḥ yataḥ pucchaṃ tataḥ surāḥ

3.7

फणिनिःश्वाससंतप्ता हरिणाप्यायिताः सुराः

phaṇiniḥśvāsasaṃtaptā hariṇāpyāyitāḥ surāḥ

3.7.2

मथ्यमाने ऽर्णवे सो ऽद्रिर् अनाधारो ह्य् अपो ऽविशत्

mathyamāne 'rṇave so 'drir anādhāro hy apo 'viśat

3.8

कूर्मरूपं समास्थाय दध्रे विष्णुश् च मन्दरम्

kūrmarūpaṃ samāsthāya dadhre viṣṇuś ca mandaram

3.8.2

क्षीराब्धेर्मथ्यमानाच्च विषं हालाहलं ह्य् अभूत्

kṣīrābdhermathyamānācca viṣaṃ hālāhalaṃ hy abhūt

3.9

हरेण धारितं कण्ठे नीलकण्ठस्ततो ऽभवत्

hareṇa dhāritaṃ kaṇṭhe nīlakaṇṭhastato 'bhavat

3.9.2

ततो ऽभूद्वारुणी देवी पारिजातस्तु कौस्तुभः

tato 'bhūdvāruṇī devī pārijātastu kaustubhaḥ

Agnipurāṇa